پاکستان تحریک انصاف کے ترجمان فواد چوہدری کا کہنا ہے کہ عمران خان نے وزارت اعظمیٰ کی تقریب حلف برداری سادگی سے کرنے کی ہدایت کی ہے، وہ ایوان صدر میں حلف اٹھائیں گے۔
فواد چوہدری نے بتایا کہ تقریب مکمل طور پر قومی تقریب ہوگی جس میں چیئرمین تحریک انصاف کے چند دوستوں کے علاوہ بیرون ملک سے کسی بیرونی شخصیت کو دعوت نہیں دی جائے گی۔ دوسری جانب ہفتہ وا ر بریفنگ میں وزارت داخلہ کے ترجمان ڈاکٹر فیصل نے وزارت اعظمیٰ کی حلف برداری سے متعلق ایک سوال کا جواب دیتے ہوئے کہا تھا کہ ممکنہ وزیراعظم کی حلف برداری کی تقریب میں غیر ملکی مہمانوں کی شرکت کا تحریک انصاف ہی بتاسکتی ہے۔
واضح رہے کہ اس سے قبل پی ٹی آئی رہنما نعیم الحق کا کہنا تھا کہ عمران خان عوام کے سامنے حلف اٹھانے کے خواہشمند ہیں جس کے لیے ڈی چوک یا پریڈ گراؤنڈ کا مقام زیرغور ہے۔بشکریہ روزنامہ جنگ
