سماجی رابطے کی ویب سائٹ ٹوئٹر نے تحریک لبیک پاکستان کے سربراہ علامہ خادم حسین رضوی کا آفیشل ہینڈل بلاک کردیا ۔
سماجی رابطے کی ویب سائٹ کی انتظامیہ کے مطابق خادم حسین رضوی کا ٹوئٹر ہینڈل قواعد و ضوابط کی خلاف ورزی کے باعث بند کیا گیا۔ اس سے قبل ٹوئٹر نے علامہ خادم حسین رضوی کے اکائونٹ کی بندش کے حوالے سے حکومت پاکستان کی درخواست مسترد کردی تھی ۔
آج کراچی میں ایک تقریب سے خطاب میں وفاقی وزیر اطلاعات و نشریات فواد چوہدری نے انکشاف کیا تھاکہ پاکستان نے ٹوئٹر انتظامیہ سے خادم حسین رضوی کا ٹوئٹر ہینڈل بند کرنے کی درخواست کی تھی ،جسے مسترد کردیاگیا ہے۔
دوسری طرف تحریک لبیک پاکستان نے پارٹی قائد کا ٹوئٹر اکائونٹ بلاک کرنے کی شدید مذمت کی اور اکائونٹ کی بحالی کا مطالبہ کیا ہے ۔ ٹی ایل پی کے سربراہ کے اکاونٹ سے آسیہ بی بی کی سپریم کورٹ سے بریت کے فیصلے کے خلاف لاہور سمیت ملک کے مختلف شہروں میں احتجاجی دھرنے دیے تھے۔
علامہ خادم رضوی نے لاہور میں ہونے والے دھرنے کی قیادت کی تھی اور حکومت سے مذاکرات کامیاب ہونے اور معاہدے کے بعد دھرنا ختم کیا تھا۔بشکریہ روزنامہ جنگ
